一個非典型敘述性詭計騙局—《從前…有個荷里活》 Once Upon a Time… in Hollywood [𠝹櫈電影學會]

September 9, 2019 0 By Ronny Jaskolski


如果要講一套對流行文化影響深遠嘅電影,
Pulp Fiction基本上都一定榜上有名。 Pulp Fiction 呢套戲
可以話係電影歷史上一部偉大嘅經典。 除咗係後現代主義電影嘅一個上佳典範之外, Pulp Fiction無論喺畫面上定係劇情結構上
都可以話受到唔少後世作品嘅致敬以及模仿, 就好似周星馳都喺百變星君入面向呢部入面
尊特拉華特同奧瑪花曼嘅經典跳舞場面。 昆頓塔倫天奴,被譽為邪道Cult片嘅大宗師,
曾經講笑咁講過佢拍完十套電影就會收山, 由佢嘅第一套作品《落水狗》到對上一套
喺2015年出品嘅《冰天血地8惡人》, 加埋已經有八套作品,每一套電影嘅題材都係想像雄奇,
亦都體現出佢人肉電影庫嘅特色。 而嚟到佢嘅第九套作品,
題材嚟到1969年嘅美國荷里活,
究竟昆頓塔倫天奴又為我哋帶嚟咗啲乜嘢驚喜呢? 大家好,我係米迦,
歡迎大家收睇新一集嘅《𠝹櫈電影學會》, 我哋今集講嘅電影就係昆頓塔倫天奴嘅第九套大作:
Once Upon A Time… In Hollywood
《從前…有個荷里活》。 其實呢套電影都上映咗一段時間,我都睇咗一段時間,
不過主要就係因為我無乜心情寫, 所以拖到依家先補返出呢套戲嘅影評。 好喇咁交待完點解咁遲出呢套戲嘅影評之後, 講返正題。 呢套戲其實爭議性都幾大,
有啲人就話李小龍喺套戲入面變咗小丑咁係辱華, 而有啲人就話入面女角嘅對白極少,
有Sexism之嫌。 呢啲其實我都唔太想評論,
因為爭拗呢啲其實無乜意思。 因此與其爭拗呢啲觀點與角度嘅問題,
不如我哋睇下究竟昆頓喺呢套戲 埋下咗啲乜嘢有意思嘅概念好過啦。 不過喺講之前,就先做過簡短嘅故事簡介先。 故事設定喺二十世紀六十年代末,
1969年嘅美國荷里活, 由李安納度迪卡比奧 Leonardo DiCaprio
所飾演嘅Rick Dalton陷入咗事業嘅低潮, 曾經憑住幾套電影以及一部好出色嘅西部電視劇
Bounty Law 而紅極一時嘅佢, 因為主流文化以及時代嘅轉變
令到佢漸漸步入過氣明星行列。 雖然係咁,但佢嘅特技替身兼好朋友,
由Brad Pitt所飾演嘅Cliff Booth一直都喺佢身邊鼓勵佢。 而喺同一時間,Dalton
喺比華利山上嘅別墅嚟咗個新鄰居, 而呢對新鄰居就係著名導演羅曼·波蘭斯基夫婦, 因此由Margot Robbie所飾演嘅波蘭斯基太太,
女星Sharon Tate 就成為咗Dalton嘅新鄰居。 故事就圍繞住呢三位主要角色發展落去,
喺呢度都唔講太多喇,大家自己去睇啦。 昆頓嘅呢套講述荷里活六十年代尾嘅作品
可以話係佢對荷里活嘅一封情書, 入面實在有太多有意義嘅內涵同埋唔同致敬位,
而且今次成個故事結構亦都係十分特別, 都值得大家去思考一下。 因此以下落嚟,我會從三個方向
去講下我自己喺呢套電影睇到啲乜嘢, 分別就係呢套戲入面嘅致敬、
象徵意義同埋劇情結構。 不過喺講我點睇之前,當然就先要做個宣傳先啦, 如果你係第一次睇我哋呢個Channel 嘅話,我哋主要就係
用評論同分析嘅方向去講解唔同嘅文化資訊, 亦都會介紹唔同嘅文化知識, 所以你哋睇完覺得唔錯嘅
就記得Subscribe我哋同㩒埋右邊果個啷啷喇。 重有嘅就係記得Follow埋我哋HappyKongner
唔同平台嘅社交媒體,
喺果度你會得到我哋最新嘅資訊, 而如果你想得到關於我米迦嘅最新資訊嘅話
就記得Follow我嘅Instagram喇! 最後就係以下落嚟將會有大量嘅劇透,
未睇呢套戲嘅朋友就記得自己小心喇。 好喇咁講完一大堆廢話之後,
首先我想事先聲明嘅就係, 我呢度係唔會講呢套戲入面昆頓咁樣描寫李小龍
係咪辱華嘅問題,因為其實無乜好講, 大家都會有唔同角度去睇,
而你可以聽完我講嚟緊我要講嘅嘢之後, 再去諗下呢個位係真實定係假象, 先再去諗下昆頓咁樣描寫李小龍係咪辱華又得。 一開始我哋先嚟講下呢套戲唔同嘅致敬位。 作為一套以荷里活六十年代做藍本嘅電影
以及加上昆頓人肉電影庫嘅能力, 呢套戲嘅致敬位可以話係多不勝數,多到點呢? 多到係連呢套戲嘅戲名都係致敬位嚟。 而呢樣嘢就首先要講下呢一位意大利
傳奇導演Sergio Leone。 Sergio一生人總共拍咗七套電影,
分別係佢一套叫做《羅德島巨像》嘅史詩電影, 兩套三部曲電影。
而佢嘅第二套三部曲電影係佢嘅顛峰之作, 我哋俗稱為Once Upon a Time Trilogy。
無錯,呢三套電影分別就係 《萬里狂沙萬里仇》Once Upon a Time in the West、 Once Upon a Time … the Revolution 同埋《義薄雲天》Once Upon a Time in America。 咁樣唔使我講你都知點解呢套戲
叫做Once Upon a Time in Hollywood 啦, 而呢三部電影都係西部片嚟。
又或者咁講,Sergio Leone 就係西部片嘅大宗師, 因為佢哋另一套三部曲電影都係舉世聞名嘅西部片, 由奇連伊士活Clint Eastwood擔綱演出嘅
Dollars Trilogy 獨行俠系列, 其中最出名嘅莫過於《獨行俠決鬥地獄門》
The Good the Bad and the Ugly, 而呢一套戲亦都係昆頓最喜愛嘅電影。咁樣我哋
就唔難理解點解昆頓會用上對Sergio Leone 嘅致敬, 因為昆頓講過佢自己最中意嘅題材就係西部片。 而最諷刺嘅就係,戲中由李安納度飾演嘅
Rick Dalton最憎嘅就係意大利西部片, 姐係意粉西部片,因為好似佢喺戲入面咁講, 拍意粉西部片一係就代表佢初出茅廬,
一係就代表佢已經過氣。 問題在於,
究竟係因為Rick過咗氣定係西部片已經過氣呢? 呢樣嘢我哋可以留返喺象徵意義果部分先再講。 當然除咗呢啲之外,昆頓喺成套戲入面基本上
係明眼人都知道佢係想講Sharon Tate 嘅故事, 而Sharon Tate 嘅故事就當然離唔開
Manson Family 呢個邪教組織嘅故事, 當然佢亦都為咗還原當年嘅情況
亦都用咗好多同Sharon Tate有關係嘅嘢, 例如 佢真實拍過嘅The Wrecking Crew,
Charles Manson 嘅探訪
同Manson Family唔同成員嘅出現, 亦都確確切切將我哋帶返到去當年嘅荷里活, 甚至係連波蘭斯基後嚟拍Tess 嘅原因都搬埋出嚟, 原來都係嚟自Sharon Tate 訂俾佢嘅果本Thomas Hardy
就係Tess嘅原著“Tess of the d’Urbervilles”。 不過我比較肯定嘅一樣嘢係,
如果本身睇呢套戲嘅時候唔清楚Manson Family 同Sharon Tate嘅關係嘅話, 你就會覺得呢套戲好似講嚟講去都唔知講緊乜嘢, 呢個就係昆頓嘅佈局嚟,
因為如果你知道Manson Family嘅嘢嘅話, 你就會完完全全感受到昆頓嘅佈局
係有啲乜咁有衝擊性 。 可能大家都唔知Manson Family咩來頭,
呢個就同我哋第二樣要講嘅嘢有關, 就係呢套戲嘅象徵意義。
而喺呢度我就先講下美國當時嘅時代背景。 六十年代,係冷戰時期入面一個好重要嘅年代, 除咗有兩個超級大國嘅擦邊磨擦之外,
美國本土文化 亦都受住Beat Generation 文化影響。 咁咩嘢叫Beat Generation呢? Beat Generation 係後現代主義文化入面
一個好重要嘅時期, 主要係由幾位作家創造出嚟嘅思潮,呢幾位就係 Allen Ginsberg, William S. Burrough, Jack Kerouac, Herbert Huncke, Lucien Carr, 佢哋主張反對社會流行嘅價值觀,
進行唔同嘅精神探索, 對美國原住民同東方宗教文化嘅探索,
反對物質主義, 試驗唔同嘅迷幻藥以及高呼性解放思想。 因為當時美國作為世界二強之一,
其經濟實力可以話領先全球, 而喺社會物質豐富嘅年代,
人就會開始追求精神上嘅滿足, 因而產生一堆追求精神上解放嘅青少年。 而喺六十年代,
美國社會受到唔同嘅新思想衝擊, 例如黑人民權運動嘅平權、言論自由運動之下
追求嘅言論、學術同政治自由思想、 新左翼高舉嘅新自由主義以及
因為越南大戰衍生出嘅反戰文化, 東方以及波希文亞文化嘅興起,都令到Beat Generation
開始轉化成為一個新嘅群體: Hippie 嬉皮士文化。 嬉皮士文化唔單止影響咗戰後嘅年輕人,
戰後嬰兒潮出世嘅果堆 去到六十年代尾都已經成長成為年青人,
令到嬉皮士文化主導咗當時主流嘅流行文化。 咁點解我會無啦啦講到呢度呢?
就係因為Charlie Manson 就係靠嬉皮士文化入面嘅年青人 組織起佢哋嘅Family。喺戲入面我哋都見到, Cliff 遇上嘅果堆後生仔,
其實佢哋都係嬉皮士嚟, 而佢哋所佔領嘅地方,
係一個用嚟拍西部片嘅牧場。呢 個亦都係歷史上Charlie Manson 點樣
組織佢嘅信徒去謀殺Sharon Tate嘅地方。 如果咁樣理解嘅話,我哋就會好清晰成個概念。 昆頓喺呢套戲對於西部片嘅致敬,
可以顯示出佢認為當時嘅荷里活 之所以係咁美好就係因為有住呢啲西部片, 而Sharon Tate 亦都代表住荷里活嘅美好,
而就係因為嬉皮士文化嘅出現, 取代咗西部片喺主流文化嘅地位,
佔領咗拍攝西部片嘅地方, 而亦都催生咗殺死荷里活
美好平靜嘅兇手Manson Family, 因此Rick Dalton 對於嬉皮士嘅恨意,
Cliff喺牧場度狠狠打果個嬉皮士, 都係嚟自昆頓對於嬉皮士嘅恨,
破壞咗佢心目中荷里活嘅美好, 而咁樣我哋唔難明白呢套戲嘅鋪陳究竟係乜嘢,
除咗係對荷里活嘅愛, 重係昆頓發洩自己怒意嘅地方,而喺呢度, 昆頓就用咗一個方法去令到觀眾都享受到呢種感覺, 就係最後高潮果半個鐘嘅暴力美學劇情。 但點樣可以令大家喺咁嘅暴力場面之中
更加體會果個爽嘅感覺呢? 呢個就係昆頓點解喺劇情結構上係大宗師嘅原因, 而呢個就係我嚟緊要講嘅第三樣嘢,
亦都係呢條片題目上 有提及過呢一個詞語:敘述性詭計 我哋都知道,
昆頓塔倫天奴一向出哂名中意玩敍事結構。 例如我一開頭講過嘅Pulp Fiction 入面
就用咗一個十分完美嘅非線性敍事結構概念, 而今次佢喺呢套戲入面玩嘅就係推理小說
入面嘅一種敍事方式:敘述性詭計。 咩為之敘述性詭計呢?
就係作者以文字技術同敘述結構嚟嘗試誤導讀者, 例如作者會將作品入面場景Setting 嘅
某啲客觀元素,例如時間地點人物之類, 令到讀者會有先入為主嘅感覺, 然後喺最後揭露真相果陣
就一次過將你對作品嘅認知全盤推翻, 以製造出腦爆嘅感覺,
而當你再重新再睇多一次嘅時候, 就會發現好多線索指明咗以往讀者錯失咗嘅真相, 令到再睇一次都可以回味無窮。 簡單啲嚟講就係喺故事敘述過程之中
刻意掩蔽又或者誤導, 就會令到讀者對呢啲Setting 有住錯誤嘅認識,
繼而就會對作品入面嘅故事進程作出咗錯誤嘅判斷。 敘述性詭計嘅作品講求嘅就係逆轉震撼效果,
因此最大嘅問題就在於, 當你知道佢有住敘述性詭計嘅時候,
你就會失去咗成盤佈局嘅意義。 電影唔同普通小說,
你睇書你係一路睇一路對唔同角色產生認知, 但電影因為有Trailer 嘅原因,喺套戲未睇之前 基本上你都已經知道哂有咩人做主角,
故仔講啲乜嘢。 喺呢度就顯示出點解昆頓喺劇情結構上
係大宗師嘅原因, 因為佢直程喺你未睇呢套戲之前
話明俾你知呢套戲係講啲乜嘢, 就係因為佢喺劇情上佢刻意做咗個嚴重劇透,
就係Sharon Tate。 基本上如果你對美國荷里活電影歷史有認識嘅
都會聽過Sharon Tate呢個名, 基本上你喺睇戲之前Google 下
都知喺Sharon Tate 身上發生過啲乜嘢悲劇, Manson Family 係幾咁無人性,而喺昆頓手上, 呢個就係佢第一個佈局,
令到你喺入場睇戲之前已經先入為主咗 呢一套戲係講Sharon Tate 嘅遭遇嘅故事。 因此當戲入面昆頓將劇情重心放喺Rick
同Cliff 嘅關係上面果陣, 其實我哋個Focus 都會重喺Sharon Tate,
因為有Sharon Tate 出現嘅鏡頭, 我哋都會留意佢嘅行為,
即使係幾咁平凡無意義都好, 我哋都已經先入為主地認為咗,
Sharon Tate嘅行動對故事進程有影響, 呢個係昆頓第二個佈局,令到你喺睇呢套戲果陣都不斷集中喺Sharon Tate 上面。 跟住就係唔同嘅真實致敬,
例如放咗唔同真實嘅人物同埋電影入去套戲入面, 例如你會見到波蘭斯基、
李小龍Steve McQueen James Stacy 等等, 因為呢啲都係歷史上面出現過真實嘅人,
因此你又先入為主地諗呢個係一個歷史故事, 即使你明知道Rick 同Cliff 係虛構角色都好,
你都因為戲入面有呢啲咁嘅歷史人物, 而令到你會諗究竟Rick 同Cliff 係咪代表某啲人, 甚至昆頓為咗加強呢樣嘢嘅可信性,
佢直接放埋Charlie Manson 探訪Sharon Tate 呢段歷史事實入去,
去強化成個歷史感, 呢個係佢第三個佈局,
令你以為呢套戲係參考歷史事實拍出嚟嘅電影。 因住呢三個佈局,昆頓就將大部分觀眾嘅期待
轉化成心驚膽顫嘅感覺。 例如當Cliff去到牧場果陣,見到Manson Family 嘅唔和諧
你就會怕Cliff會唔會因而被害, 例如當最後去到歷史上Sharon Tate 遇害一晚,
作為Sharon鄰居, Cliff High 咗嘢去放狗,Rick老婆瞓鬼咗,
Rick就戴住耳筒喺泳池飲緊酒, 而同時Manson Family亦都準備佢哋嘅殺人行動嘅時候, 你就會擔心Rick 同Cliff會唔會因而遇害,
然後就到Sharon Tate。 Manson Family潛入咗Rick 屋企,準備下殺手,
呢套戲去到最緊張最綳緊嘅一刻, 而喺呢個時候昆頓就開始咗逆轉嘅一刻,
接住落嚟我哋就係見到 Manson Family三位行兇者嘅下場,
而睇呢一段情節嘅時候我相信所有人都會覺得好爽, 唔知道Sharon Tate 經歷嘅人爽,
知道嘅就更加爽。 特別係當Rick 用火焰噴射器燒死Sexy Sadie果度,
除咗又係昆頓另一個對自己電影 《希魔撞正殺人狂》嘅又一致敬位之外, 喺現實世界Sexy Sadie死於獄中
到最後都係被火化成灰。 三人經歷一輪暴力過後死狀係好恐怖,
但係唔知點解你就係會覺得好爽, 而呢個就係昆頓想俾各位觀眾嘅感覺,
就係以武制暴嘅爽快感覺, 亦都可以話係昆頓對Manson Family呢個
摧毀佢美好回憶報仇雪恨嘅方法。 最後成個故仔就隨住Rick 上門訪問Sharon Tate
而完結,可以話係一個Happy Ending。 而當你諗返轉頭,其實昆頓喺好多地方
都已經話咗俾你聽呢個係一個虛構嘅故事, 一個佢心目中六十年代荷里活應該有嘅結尾,
而唔係現實世界果一個對於Sharon Tate 同六十年代荷里活嘅Bad Ending。
因為當你諗返Once Upon A Time in Hollywood 嘅Once Upon A Time 其實有機會
又係一個Wordplay 嚟, 你喺邊度會經常聽到呢個Phrase? 咪就係童話故事。 童話故事承載嘅就係我哋童年嘅美好回憶, 而Once Upon A Time in Hollywood呢個故事
可以話係昆頓自己為自己童年時代嘅荷里活 寫嘅一個充滿暴力與黑色幽默嘅童話故事。 因此嚟到最後,諗返一開始李小龍嘅問題,
其實我就覺得無乜所謂, 雖然我睇果陣都覺得突兀,
但如果你當呢個係一個虛構故事嘅話, 咁其實係無乜問題。如果咁樣都係辱華嘅話, 我相信FGO啲乜嘢動漫遊戲應該都可以準備執笠都得, 創作嘅嘢就係咁嫁啦,
連佛祖同耶穌基情洋溢都有, 更何況係一大堆惡搞二次創作呢。 總括而言,《從前…有個荷里活》
Once Upon A Time… In Hollywood 呢一套電影其實玩味係好重,
始終呢套係昆頓塔倫天奴電影, 離經叛道就一定嫁喇,而且入門門檻都唔低。 如果唔係嘅話佢就唔係叫昆頓塔倫天奴啦係咪? 如果你睇戲係要好認真,
唔講得笑唔搞得笑嘅話, 咁我諗呢套戲對於你嚟講真係唔會好睇。
而同時如果你本身對美國文化 又或者荷里活文化無乜認識嘅話,
你可能都會覺得呢套戲頭個幾兩個鐘唔知做緊乜, 只有最尾果段高潮叫做有啲娛樂性,
所以就未必會覺得好睇。 但如果你本身係昆頓塔倫天奴電影發燒友,又對美國文化
同荷里活文化有一定認識又或者有做過功課嘅話, 咁我相信你睇完之後應該就會覺得好爽快。 不過當然喺最後都係要戴返個頭盔先,
評論嘅嘢就一定係主觀嘅, 因為每個人唔同嘢嘅睇法都唔同,因此
你同我喺呢套戲上面嘅觀點與角度唔同係十分之正常, 但如果閣下都總係覺得自己啱哂,
人哋點講都係錯嘅話, 咁我只能夠講一句: (你咁樣係唔會令我驚嫁) 今集嘅《𠝹櫈電影學會》就講到呢度,
唔知大家又對呢套 Once Upon A Time… In Hollywood
《從前…有個荷里活》 有啲乜嘢睇法呢?不妨留個言話我知啦。 嚟到最尾當然就係要再一次呼籲大家
要Follow 我哋HappyKongner唔同平台嘅社交媒體, 重有就係當然就唔少得要
Follow埋我米迦嘅Instagram喇!最後都係果句啦, 中意我呢條片嘅朋友就記得做好益者三有,
有Like 有Subscribe有Share, 我係米迦,我哋下一集《𠝹櫈電影學會》再見!